Aqmescit 1-nci SİZO-sınıñ müdiriyeti Rusiye mahkemesi tarafından apis cezasına mahküm etilgen vatandaş jurnalisti İrına Danılovıçnıñ qanun bozuvları ile bağlı bütün şikâyetlerini yoq ete eken.
Müdiriyet arizalarını körmemizlikke ura, yuqarı organlar ise yoq ete.
"SİZO-da öz sıñırsız iqtidarına o qadar işanğan ve özüni er angi bir qanundan yuqarı tutqan insanlar bar", - dep qayd ete siyasiy mabüs.
Bundan ğayrı, o, prokuraturağa üç ariza azırlağan, amma SİZO hadimleri olarnı yollamağa imkân bermey ekenler. Arizalardan birinde İrına Danılovıç, o, üç aydan çoq vaqıt devamında telefondan faydalanıp olamağanı, ekincisinde advokatqa mektüleriniñ berilmemesi aqqında yaza. Üçüncisinde ise müdiriyet yarım yıldır oña ketirilgen kitapnı bermegeni aqqında yaza.
Daa evel vatandaş jurnalisti İrına Danılovıçnıñ babası Bronıslav Danılovıç qızınıñ sağlıq alı ep fenalaşa, o, SİZO-daki şarait sebebinden eşitme qabiliyetini ğayıp ete bile, dep haber etken edi.
Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi. İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırışa edi. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Video adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
Danılovıç emşire olıp çalışa edi, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yıl apis cazasına makhüm etti. Mahkeme qadınnı Rusiye Ceza Qanunnamesiniñ 222.1 maddesi ile «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını berildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
