Qırımnıñ Rusiye yolbaşçısı Sergey Aksenov bildirdi ki, oña Aqmescit sakinlerinen musluq suvınıñ keyfiyetinen bağlı şikâyetler kele.
Bu aqta o, fevralniñ 1-nde suv teminlevi meseleleri operativ ştabınıñ toplaşuvında ayttı.
«Kamskaya soq., 37 adresinden suv keyfiyetinen bağlı şikâyetler oldı. Bir sıra adreste kanalizatsiya qoqusınen bağlı muracaatlar oldı ve Radişçeva soqağından sakinler suvnıñ sarı tüsü bar, dep şikâyet etti. Şunıñ içün keyfiyet ceetinden tafsilâtlıca baqmañıznı rica etem», – dedi Aksenov.
Keçken afta «Voda Krıma» müessisesi Aqmescitte yanvarniñ 28-nden Veseloye-Dzerjinskoye yañı magistral suv borusı açılğanı içün suv keyfiyeti «biraz fenalaşa» bile, dep tenbilegen edi.
Yanvarniñ 18-nde Aqmescitte musluqtan yaramay qoqulı suv kelip başladı. Bajenovnıñ aytqanına köre, bunıñ sebebi lay oldı, şunıñ içün suvnıñ hlorlanması quvetleştirilgen edi.
Qırımnıñ Rusiye mesken-kommunal hocalığı nazirligi bildirdi ki, yaramay qoqu ammiak ve natriy gipohloridi himik reaktsiyası sebebinden peyda oldı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
