Rusiye FSBsi Aqmescit sakinini tutıp, «mahsus arbiy operatsiyada» (RF akimiyeti Ukrayınağa qarşı cenkni böyle adlandıra – QA) iştirak etken Rusiye arbiylerini cezalamağa çağırğanında qabaatladı. Bu aqta «Krıminform» Rusiye devlet neşiri Rusiye FSBsiniñ matbuat hızmeti malümatına esaslanıp bildire.
«1980 senesi doğma Aqmescit sakini Telegramnıñ çatında Ukrayınanıñ denatsifikatsiyası ve askeriysizleştirüvinen bağlı mahsus arbiy operatsiyada iştirak etken Rusiye Federatsiyasınıñ silâlı quvetleriniñ arbiylerini cezalamağa çağırğan izaatlar qaldırğan edi», – dep bildirdi Rusiye FSBsi.
Er adamına qarşı Rusiye tahqiqatçıları Rusiye Ceza kodeksiniñ 280-inci maddesine istinaden (ekstremizmge çağıruv) cinaiy dava açtı. Aqmescit sakini beş yılğa qadar azatlıqtan marum etile bile. Tutulğan kişiniñ adı ve soyadı aytılmay, onıñ izaatları da yoq.
Qırım ve Aqyarda Rusiyeniñ Ukrayınağa qarşı istilâsına qarşı çıqqanların taqip etmege devam eteler. Kütleviy haber vastalarınıñ soñki malümatına köre, fevralniñ 24-nden başlap 107-den çoq qırımlı Rusiye ordusını «itibardan tüşürüv» idariy davalarınıñ mabüsleri oldı, 11 Qırım ve Aqyar sakini «cenkke qarşı davalarğa» istinaden apiske alına bile.
Bundan ğayrı, Aqyarnıñ Rusiye akimiyeti Ukrayına akimiyetine qoltutqanlarnı çaqacaq chat botunı açtı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.