Rusiye kontrolindeki Qırım Yuqarı mahkemesi Aqmescit rayonınıñ sakinini Ukrayina telükesizlik hızmeti ile işbirliginde qabaatlap, 20 yıl koloniyada qalmasına üküm etti, dep haber ete mahkemeniñ matbuat hızmeti.
Rusiye kütleviy haber vastaları Qırım ve Aqyardaki FSB idaresiniñ malümatına esaslanıp yazğanına köre, erkek UTH vazifesinen patlayıcı cihaz içün parçalarnı ve 1 kilodan ziyade patlayıcı maddenen gizli yerni tapmağa niyetlengen edi, onı tutıp, devlet hainliginde ve patlayıcı maddelerni qanunsız alğanında qabaatladılar.
"RİA Novosti Krım" agentligi Rusiye FSBsi çıqarğan videonı derc etti, anda beti qapatılğan erkek mabüs olaraq tanıtıla ve Rusiye uquq qoruyıcılarınıñ malümatını tasdıqlay. Er adamnıñ adı ve soyadı aytılmay, video da basqı altında çıqarılğanda.
FSB seslenirgen malümatnı alternativ menbalarda tasdıqlamaq cenk vaziyetinde zor ola. Ukrayina telükesizlik hızmeti bu malümatnı izaatlamadı.
Aq qorçalayıcılar devlet hainligi, Ukrayina ile işbirligi, casuslıq ve diversiyalarnen bağlı maddeler boyunca davalarnıñ sayısı Qırımda artacaq, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda 10-dan ziyade olmay edi.