Oktâbrniñ 25-nde quvetçiler Rusiyeniñ nezaretinde olğan Qırım garnizon arbiy mahkemesiniñ binası ögünde toplaşqan qırımtatarlarnı tuta.
Bunı Qırım.Aqiqatqa "Qırım birdemligi" cemaat birleşmesi haber etti.
Olarnıñ malümatına köre, oktâbrniñ 25-nde qırımtatar faalleri mahkeme binası ögünde toplaşqanlar. Bu yerden advokatlar video konferentsiyası vastasınen bugün Cenübiy bölgeniñ arbiy mahkemesiniñ Rustem Emirüseinov, Arsen Abhairov ve Eskender Abdulganiyevge çıqarğan ükmünen qarşı advokatlarnıñ istinaf şikâyetleri bakılacaq mahkeme oturışında iştirak etmek kerek ediler. Rusiye polisiniñ hadimleri toplaşqanlardan dağılmağa talap etkenler, bundan soñ OMON hadimleri mahkeme binası ögünde toplaşqan er kesni avtobuslarğa oturtıp başlağanlar.
Berilgen malümatqa köre, şimdilik "Grani" rus neşriniñ matbuat kartası olğan Ruslan Paralamov ve Zidan Acikelâmov da tutulğan.
Oktâbrniñ 11-nde, Aqmescitte Qurmandaki «Hizb ut-Tahrir davasınıñ» ükmüne qarşı istinaf baqılacaq olğan mahkeme binası ögünde Rusiye quvetçileri 15 qırımtatarını tuttı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
