Kreml nezaretindeki Qırım akimiyeti, Aqmescit rayonınıñ Yañı Sarabuz (Ukromnoye) köyünde 600 talebelik umumtasil mektepniñ qurulmasını taqdirledi, dep bildire rusiyeli Qırım Qurucılıq ve Mimarlıq Nazirliginiñ matbuat hızmeti.
"Bu obyektniñ leyha vesiqaları, müendis tetqiqatlarnıñ neticelerine, sanitar-epidemologiya, ekologiya, yanğın telükesizligi talaplarına uya", – yaza Qırım Qurucılıq ve Mimarlıq Naziri Mihail Hramovnıñ sözlerinden matbuat hızmet.
Beyanatqa köre, bu leyha kontraktınıñ fiyatı 8 million rubleden çoq (3 million ğrıvnâ - QA).
"Mektep, umumen 9 biñ metr kvadrat ve üç qattan ibaret olacaq. Maqsatlı Federal Programmasınıñ çerçivesinde qurulış işlerini, aqımdaki yılnıñ soñunace başlamağa niyetleneler", - dedi rusiyeli nazir.
Qırımnıñ rusiyeli tasil nazirliginiñ malümatına köre, bu yıl mektepten qararnen 10 biñ adam mezun oldı.
2019 senesinden, Qırım studentleriniñ Rusiye aliy oquv yurtalrına qolaylaştırılğan kirüv qaideleri lâğu etildi. Qırım talebeleri, Rusiye universitetlerine umumiy temeller esasında kirecek.
Ukrainada Qırım mezunları içün qolaylaştırılğan kirüv sisteması çalışmaqta.
