Aqmescit rayonınıñ Nikolayevka qasabasında koronavirus telükesi sebebinden ilân etilgen sıñırlavlar vaqtında gizli alış-veriş yapılğanı ve yarmalıqta insanlarnıñ bir yerde toplaşqanı qayd etildi. Bu aqta Rusiye kontrolindeki Qırım ükümetiniñ reisi Yuriy Gotsanük aprelniñ 24-nde bildirdi.
«Ticaret gizli yapıla. Meselâ, yapma çeçekler levhası altında urba ve ayaqqap, avto tükânı olaraq balıqçılıq aletleri ve ilâhre. Bazarda yarmalıq oldı, «65+» bayağı insan bar edi, mesafege riayet etilmedi», – dep tarif etti o.
Gotsanükniñ aytqanına köre, Aqmescit rayonınıñ Üç Quyu Tarhan (Kolodeznoye) köyünde bala, sport meydançıqlarında balalar ve esli-başlı vatandaşlar maskasız qayd etildi, mesafege uymadılar.
Memurnıñ aytqanına köre, rayon ealisi evlerniñ kirişleri yaramay yuqunçsızlaştırıla ve avtobus aydavcıları maskasız çalışa, dep şikâyet ete.
Aprelniñ 24-nde saba Qırımda dört yañı koronavirus hastası qayd etildi. Al-azırda Qırımda 57 koronavirus hastası bar. Aqyarda 25 COVID-19 hastası qayd etildi. Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
