Rusiye Federatsiyası kontrolindeki Qırım Yuqarı mahkemesine Rusiye uquq qoruyıcıları Ukrayina telükesizlik hızmeti ile işbirligi sebebinden devlet hainliginde qabaatlanğan Aqmescit rayonınıñ sakinine qarşı cinaiy dava yollandı. Bu aqta Rusiye qurğan Qırım prokuraturası haber ete.
Haber etilgenine köre, erkek Rusiyeniñ Ukrayinağa qarşı cenkine "qarşı çıqıp", Ukrayina telükesizlik hızmetinen bağğa çıqtı ve 2024 senesi oktâbr ayında mahsus hızmetlerniñ vazifesine köre Aqmescit rayonındaki gizli bir yerden 1 kg ziyade geksogenli patlayıcı cihaznı almaq kerek edi, faqat Rusiye FSBsi tarafından tutuldı.
Erkekniñ adı ve soyadı aytılmay, açıq izaatları ise yoq. Rusiye uquq qoruyıcılarınıñ versiyasını mustaqil menbalar yardımınen cenk vaziyetinde tasdıqlamaq imkânsız ola. Erkekniñ qabaatı isbatlanmasa, onı devlet hainligi ve patlayıcı cihazlarnı saqlav maddelerine istinaden ömür boyu apis cezasını ala bile.
Ukrayina telükesizlik hızmeti bu haberlerni daa izaatlamadı.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
