Aqmescit rayonınıñ Bötke (Dubki) köyündeki camige Rusiye politsiyası ve OMON hadimleri keldi. Bu aqta «Qırım birdemligi» cemaat birleşmesi yanvarniñ 18-nde haber ete.
Faaller, Facebooktaki saifede politsiya maşinaları ve cami yanında toplaşqan yerli sakinler qayd etilgen fotoresimlerni derc ete.
Haber etilgeni kibi, Rusiye uquq qoruyıcıları camige cuma namazı ögüne keldi.
«Avtozak camige yaqın yerde qala. Politsiya hadimleri azbarda, cami qapusınıñ yanında buluna. Uquq qoruyıcılarınıñ qırımlı musulmanlarnıñ camisine cuma ziyaretiniñ maqsadı ögrenilmekte», – dep haber etile.
Rusiye uquq qoruyıcıları Bötke köyünde olğanlarnı izaatlamay.
Qırımda insan aqları bozulğanınıñ monitoringi neticelerine köre, Rusiyeniñ Qırım işğalinden soñ yarımadada cami ve medreselerde 32 tintüv keçirildi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
