Qırımnıñ Aqmescit rayonınıñ Pervomayskoye köyünde keçirilgen tintüvden soñ rusiye quvetçileri qırımtatar Ahtem İsmailovnı Aqmescitteki FSB idaresine alıp ketken. Bunı "Qırım birdemligi" cemaat birleşmese haber ete
"İsmailovnıñ evinde tintüv yekünlendi. FSB hadimleri telefonlarnı, noutbuknı ve qattı disklerni tutıp aldı. Tuvğanlarınıñ sözlerine köre, onı sorğu içün Aqmescitteki FSB idaresine alıp ketkenler", - dep yazıla bildirmede.
"Qırım birdemligi"niñ bildirgenine köre, Ahtem İsmailov bu vaqialarnen bağlı ariza yazğan.
"Saba saat 7-de maskalı, kimligi beli olmağan kişiler azbarıma sürip kirip, pencere ve qapılarnı pek qaqıp alemni qorquttı. Saat 7-ni 15 daqqa keçkende FSB hadimleri qararnı kösterdiler. Azbarımda maskalı insanlarnı körip, poliske telefon ettim ve birisi evime sürip kirmege tırışqanını ayttım. Soñra özüni tanıtqan 3 FSB hadimini ve kendisini tanıtmağan 4 kişini (olardan ekisi maskalı edi) evine yiberdim. Tintüv vaqtında qomşularımdan ya da tanışlarımdan birisiniñ bulunması aqqında talabım red etildi. Bundan ğayrı tintüv vaqtında köpeklerni qullandılar. Din qanunlarına köre, evge köpek yibermek yasaq olğanını añlattım, amma menim talaplarım kene körmemezlike urundı", - "Qırım birdemligi" İsmailovnıñ arizasından alıntı ketire.
Evel Qırımnıñ Aqmescit rayonınıñ Pervomayskoye köyünde rusiye quvetçileri qırımtatar Ahtem İsmailovnıñ evinde tintüv keçirgenleri aqqında haber etilgen edi. Sebep 2023 senesi fevralniñ 23-nde Bağçasaray rayonındaki demiryolnıñ bozuqlığı aqqındaki haber olğan.
Martnıñ 9-nda saba RF quvetçileri Qurman qasabasında qırımlı Memet Aşurovnıñevinde tintüv keçirgen ve bundan soñ onı yaqalap, Aqmescitteki FSB idaresine alıp ketken edi.
Martnıñ 6-nda Sudaqta Rusiye quvetçileri qırımtatar Edem Murtazayevniñ evinde tintüv keçirgen ediler, bundan soñ o ömür arqadaşı ile beraber yaqalanıp, Aqmescitteki Rusiye Federal telükesizlik hızmetiniñ bölügine ketirilgen edi. Qırımtatar Milliy Meclisi reisi Refat Çubarov Murtazayev işğal etilgen Qırımda Bazarçıq qasabası civarındaki "Aqmescit" stantsiyasına 12 kilometr uzaqlıqtaki demiryolnıñ bir qısmını patlatuv ve zarar ketirüv şübesi ile yaqalanğanını bildirdi.
Daa evel Rusiye FSBsi Bazarçıq (Poçtovoye) köyünde demiryolğa ketirilgen zarar sebebinden Bağçasaray rayonınıñ Priyatnoye Svidaniye köyünde Cemilovlarailesiniñ evini tintken edi.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
