Aqmescit rayonında sentâbr 14-ünde qaşqırlar adamlarğa ücüm etkeniniñ eki adisesi qayd etildi. Yaralanğanlarnı hastahanege qoydılar, dep bildire Rusiye FVN-niñ Qırım idaresi.
Müessiseniñ malümatına köre, yardım berüvni Qırım Felâket tibbiyeti merkezi nezaret ete.
"Bugün Tavşan Bazar (Privolnoye) ve Anğara (Perevalnoye) köylerinde yırtıcılarnıñ adamlarğa ücüm etkeniniñ eki adisesi qayd etildi. Vaqia neticesinde yaralanğan üç adamnı Aqmescit merkeziy rayon hastahanesine ve №6 Aqmescit acele yardım hastahanesine yatqızdılar", - denile beyanatta.
2018 senesiniñ başında Qırım Ekologiya Nazirligi, Qırımda qaşqırlarnıñ sayısı arta, dep bildirgen edi. Olarnı atqanlarğa baqmadan, Qırımda qaşqırlarnıñ sayısı 53-ke arttı.
