Aqmescit rayonınıñ Anğara köyünde özen aqıntısı adamlarnen beraber eki maşnanı alıp ketti. Rusiye FVN-niñ Qırım idaresi haber etkeni kibi, qaza iyün 21-inde aqşam oldı.
"Qaza yerine kelgende, Subaru ve Nissan maşnaları özen keçitinden keçkende, suv aqıntısı olarnı alıp ketti", - denile beyanatta.
Müessise malümatına köre, üç adamnı qurtardılar, kimse tibbiy yardımğa muhtac degil.
Qırımda iyün 22-sine qadar furtuna ihtarı ilân etildi. Qurtarıcılar, yarımadada bazıda küçlü sağanaqlar, afat, iri burçaq ve 20-25 m/s qadar yel beklenilgenini bildirdi.
