Rusiye nezaretindeki Aqmescit şeer şura mebusleri, şeer memuriyeti başınıñ muavini vazifesine Yakub Zeytullayevni tayinlevini uyğulaştırdı. Bu qarar nevbetten tış olğan sessiyada alındı.
“Devlet organları sistemasında 12 yıldan çoq çalıştım. Soñki üç yıl Qırım Mesken Kommunal Hocalığı naziriniñ muavini vazifesini becere edim. Şeer amanlığı oğrunda mebuslarnen semereli işbirlik körecegimizge ümüt etem”, - yaza Zeytullayevniñ sözlerinden Aqmescit memuriyetiniñ matbuat hızmeti.
Dekabr 14-ünde Rusiye kontrolindeki Aqmescitniñ şeer şurası yañı şeer yolbaşçısı olaraq Natalya Malenkonı sayladı. İgor Lukaşev işten ayırılğan soñ o, Aqmescit memuriyeti yolbaşçısınıñ birinci muavini vazifelerini eda etken edi.
Natalya Malenkonıñ namzetine şeer şurasınıñ sessiyasında olğan 31 deputattan 30-ı rey berdi.
Aqmescit memuriyetiniñ yolbaşçısı vazifesine konkurs dekabr 14-ünde keçti. İştirak etmek içün doquz adam vesiqalarını tapşırdılar. Natalya Malenkonıñ raqibi vaqtınca çalışmağan Oleg Simonov edi.
