Aqmescitniñ Rusiye memuriyeti yolbaşçısı İgor Lukaşev Qırımnıñ Rusiye ükümeti reisi Sergey Aksenovnıñ talabı ile istifağa çıqtı. Bunı noyabrniñ 9-nda Aksenov Qırım ükümeti monitoring gruppasınıñ işi boyunca netice toplaşuvı vaqtında bildirdi.
Qırım ükümetine yaqın olğan «Krıminform» saytınıñ malümatına köre, Aqmescit memuriyeti yolbaşçısınıñ yedi muavini de Aksenovnıñ talabı ile istifağa yollanıldı.
Aksenovnıñ aytqanına köre, Aqmescit memuriyetiniñ yañı erkânı kelecek afta şekillendirilecek.
Lukaşev ve muavileriniñ istifalarınen bağlı izaatları yoq.
2018 senesi oktâbr ayınıñ soñunda Sergey Aksenov Aqmescitniñ şeer memuriyetine «memuriy terror» yapmağa vade etken edi. Rusiye kontrolindeki Aqmescit akimiyetine olğan iddialar şeerdeki çöplük ve yollardaki vaziyetnen bağlı.
Aksenov, Aqmescit memuriyetiniñ yolbaşçısı İgor Lukaşev mesüliyetli olğanını ayttı.
Aqmescitliler esas yollardaki areketni toqtatqan rıqma-rıq tolu çöplük qutuları ve yol işlerini şikâyet etken edi.
