Aqmescit soqaqları mayısnıñ 9-nda qayd etilgen Zafer bayramı arfesinde yaraştırıla. Qırım.Aqiqat mühbiri bildirgenine köre, şeerniñ soqaqlarında Rusiye ve Qırım bayraqları yelpirey, Georgiy şeritleri asıldı.
Sevastopolskaya soqağında ve Kirov caddesinde teşebbüsçiler «1945-2020» yılları ile levhalarnı astı.
Sevastopolskaya soqağında mayıs 9 renkli girlândaları yerleştirildi. «Simferopol» kinoteatri yanındaki Sovetskaya meydanında yıldız ve mayıs 9 installâtsiyaları qoyuldı.
Lenin meydanında 1941-1945 seneleri qaraman şeerleriniñ timsallerinen resimli bayraqlar asıldı, cemaat naqliyatı duraqlarında ise bayram levhaları yerleştirildi.
Daa evel berilgen malümatqa köre, Aqmescitte şeerni mayısnıñ 9-ı arfesinde yaraştırmaqtan ğayrı, yollarnıñ çuqurlarını baqalar, bağ vastaları tamirini yapalar, Yekaterina bağçasında eski töşeme taşı deñiştirile.
İşğal etilgen Qırımda koronavirus yuqunçı pandemiyası sebebinden mayısnıñ 9-nda kütleviy tedbirlerniñ keçirilüvi planlaştırılmay.
Mayısnıñ 7-nde Qırımda mayısnıñ 9-nda keçirilüvi planlaştırılğan tedbirler ilân etildi. Çoqusı koronavirus pandemiyası sebebinden online olacaq.
Rusiye Mudafaa naziri Sergey Şoygu mayısnıñ 9-nda bir sıra Rusiye şeerinde ve işğal etilgen Qırımda bayram salütları aqqında emir berdi.
Ukrainada ve çoqusı memleketlerde mayısnıñ 8-i Hatıra ve barışuv künü olaraq ilân etile.
Rusiye işğal etken Qırımda 2014 senesinden soñ «Zafer künü» sovet ve Rusiye bayramı Qızıl Ordu ve sovet halqınıñ natsist Almaniyanı yeñgen bayramı olaraq qayd etilmekte. Ukrainada mayısnıñ 8-nde Hatıra ve barışıq künü qayd etilmekte, mayısnıñ 9-nda – Ekinci cian cenkinde natsizmni yeñüv künü.
