Cumaaqşamı künü, noyabrniñ 26-nda, Moskva kontrolindeki Aqmescitniñ Kiyev rayon mahkemesi Qırımdaki «Hizb ut-Tahrir davasınıñ» mabüsi Vadim Bektemirovnıñ SİZOda qaluv müddetini 2021 senesi martnıñ 2-ne qadar uzattı.
Bu aqta advokat Marlen Halikov «Qırım birdemligine» bildirdi.
«Delillerimizge emiyet berilmedi. Er şey adiy rejimde oldı – er vaqıt kibi. Başqa bir şeyge zaten ümüt etmedik. Vadim halqqa selâm ayttı. Bu mahkeme esnasında qol tutqanları içün teşekkürler bildirdi», – dedi Halikov.
Daa evel berilgen malümatqa köre, Bektemirovnıñ imayesi onı tutuv şaraitlerini mahkemege şikâyet etecek.
Rusiye kontrolindeki Qırım Yuqarı mahkemesi advokatnıñ istinaf şikâyetini red etip, Qırımdaki «Hizb ut-Tahrir davasınıñ» mabüsi Vadim Bektemirovnı apiste qaldırdı.
Vadim Bektemirov – arap edebiyatı ve gumanitar ilimler fakültetiniñ «İslâm ilimleri» magistri, «Al-Cinan» universitetini (Trablus, Lübnan) bitirdi. Apiske alınmazdan evel siyasiy mabüslerniñ qorantaları içün dualarnı alıp bardı, apiske alınğan qırımtatar musulmanlarına aş alıp ketti, mahkemelerge bardı.
Rusiye quvetçileri Bektemirovnı iyülniñ 7-nde Qırımda keçirilgen kütleviy tintüvlerden soñ tuttı. Onı Rusiyede ve işğali altındaki Qırımda yasaqlanğan «Hizb ut-Tahrir» teşkilâtınıñ faaliyetini teşkil etkeninde qabaatlaylar.
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Qırım Muhtar Cumhuriyeti ve Aqyardaki Milliy politsiyanıñ Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezliginiñ bozuluvı) ve Ukraina Ceza kodeksiniñ 146-ncı maddesiniñ 2-nci qısmına istinaden (qanunsız alda azatlıqtan marum etüv) cinaiy tahqiqat başlattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
