Link açıqlığı

Saatnıñ esas haberi

Aqmescit mahkemesi «Qırım birdemliginiñ» koordinatorına qarşı dava açılmasını qanunğa uyğun dep tanıdı


Server Mustafayev, arhiv fotoresimi
Server Mustafayev, arhiv fotoresimi

Kreml kontrolindeki Aqmescitniñ Kiyev rayon mahkemesi mayısnıñ 16-nda Qırımda apiske alınğan «Qırım birdemligi» teşebbüsiniñ koordinatorı Server Mustafayevniñ imayesi bergen şikâyet arizasını red etip, oña qarşı dava açılmasını qanunğa uyğun dep tanıdı.

Bu aqta «Qırım birdemligi» Facebookta haber ete.

«Mahkeme şikâyet arizasını red etti. Mustafayev Serverge qarşı 205.5 maddesiniñ 2-nci qısmına istinaden cinaiy iş açılğanını qadı qanunğa uyğun dep tanıdı, çünki cinaiy dava açılmasınıñ qanuniy ve isbatlanğan sebepleri bar», – dep aytıla haberde.

Oturışuv açıq oldı.

«Qırımda Rusiye Ceza qanunlarınıñ qullanıluvı halqara qanunlarğa köre qanunsız ola. Meni ve semetdeşlerimni cinaiy taqip etüvniñ siyasiy sebepleri bar, dep tüşünem», – dep bildirdi toplaşuvda Server Mustafayev.

«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG