Rusiyeniñ nezaretinde olğan Aqmescitniñ Kiyev rayon mahkemesi keçenlerde tutulğan qırımtatar faalleri Vilen Temeryanov, Enver Kroş, Seitâya Abbozov, Murat Mustafayev, Edem Bekirov ve Rinat Aliyevni 2022 senesi oktâbrniñ 22-nece tevqifli qaldırğan. Bunı "Qırım birdemligi" cemaat birleşmesi haber ete.
Rusiye quvetçileri olarnı Rusiyede yasaq etilgen "Hizb ut-Tahrir" halqara islâm siyasiy teşkilâtında iştirak etkeninde şübeli saya eken.
"Qırım birdemliginiñ" haber etkenine köre, mahkeme oturışları qapalı keçti, jurnalistler ve diñleyicilerni içeri almağanlar.
Bunğan ğayrı, berilgen malümatqa köre, mahkeme oturışı vaqtında Aqmescitniñ Kiyev rayon mahkemesiniñ binası yanında 100-ge yaqın adam toplaşqan ve bundan sebep anda polis hadimleri kelgen.
Avgustnıñ 11-nde saba faaller işğal altındaki Qırımda Rusiye quvetçileri qırımtatarlarnıñ evlerini tinte, dep bildirdi. Advokatlarğa kirmege izin berilmedi, bazı yerlerde cep telefonı bağı söndürildi. Altı er adamı – Vilen Temeryanov, Enver Kroş, Seitâya Abbozov, Murat Mustafayev, Edem Bekirov ve Rinat Aliyev Rusiyede yasaqlanğan «Hizb ut-Tahrirde» iştirak etkeninde qabaatlanıp tutuldı.
Ukrayına prezidentiniñ Qırım Muhtar Cumhuriyetindeki temsilciligi qırımtatarlarnıñ evlerinde keçirilgen tintüvlerni takbih etti.
Hatırlatamız, 2018 senesi Rusiye quvetçileri qırımtatar faali Enver Kroşnıñ evini endi tintken edi. O, «ekstremist teşkilâtınıñ propagandası» sebebinden 10 künge apiske alındı.
Advokat Emil Kurbedinovnıñ malümatına köre, 2015 senesi dekabr ayında Rusiye quvetçileri qırımtatar faali Enver Kroşnı elektrik aqımınen işkencege oğratqan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
