Aqmescitte Rusiye kontrolindeki Qırım garnizor arbiy mahkemesiniñ binası ögünde tutulğan qırımtatar faalleri, «Grani.ru» neşiriniñ, «Qırım birdemligi» birleşmesiniñ üç jurnalisti ve advokat Edem Semedlâyev vaqtınca tutuv izolâtorına ketirildi. Bu aqta advokat Ayder Azamatov Qırım.Aqiqatqa bildirdi.
Belli olğanına köre, Dlâver Memetov ve Reşat Halilov Qurmandaki vaqtınca tutuv izolâtorında, Yunus Bulatov ve Enver Apselâmov Kefedeki vaqtınca tutuv izolâtorında, Zidan Acikelâmov ve Dilâver Memetov Kezlevdeki vaqtınca tutuv izolâtorında, Ayder Gemeci ve Ervin Emiraliyev Sudaqtaki vaqtınca tutuv izolâtorında, Erecep Memeşev ve Mustafa Bekirov Bağçasaraydaki vaqtınca tutuv izolâtorında, Remzi Bekirov ve İsmail Vaapov Canköydeki vaqtınca tutuv izolâtorında buluna, advokat Edem Semedlâyevni polis hadimleri Sudaqtaki vaqtınca tutuv izolâtorına yolladı. Faal Amethan Umerov da anda yollanıldı.
Tutulğan diger insanlarnen bağlı malümat şimdilik yoq. Bir qısmı Aqmescit şeeriniñ «Merkeziy» rayon bölüginde 11 saatten çoq buluna. Edem Semedlâyevden ğayrı er keske qarşı Rusiye Memuriy uquq bozuv kodeksiniñ 20.2.2 memuriy maddesine köre protokollar tizildi.
Advokat Emine Avamileva bildirgenine köre, advokat Edem Semedlâyevniñ Rusiye Memuriy uquq bozuvları kodeksiniñ 19.3 maddesine istinaden açılğan davanı baqacaq mahkeme Aqmescitniñ Merkeziy rayon mahkemesinde yarın olacaq.
«Bugün advokatlar institutına qarşı basqı emsali yapıla. Kelişmegen advokatlar peyda olsa, bu advokatlarnı esnaslardan bu şekilde çetleştirecekler. Zenaatdaşlarımızğa ve advokatlar toplulığına muracaat etmege isteyim, zenaatdaşımız Edem Semedlâyevge qoltutuv istidanamesini imzalasınlar. Bugün o, bu vaziyette, tünevin Emil Kurbedinov aynı vaziyette edi, yarın bu vaziyette bizden biri ola bile», – dedi Avamileva.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı.
Tutulğanlarnı Aqmescitniñ Merkeziy rayon polis bölügine alıp kettiler.
Qırımnıñ Rusiye quvet müessiseleri bu tutuvlarnı tefsir etmey.
