Rusiye nezaretinde olğan Aqmescit ryon mahkemesi Aluşta «Hizb ut-Tahrir davası» mabüsi Eldar Kantemirovnıñ ömür arqadaşı Elvina Üseinovağa yañlış taqılğan maska sebebinden cöreme ile bağlı ükümge şikâyetini uzutmaqtan red etti. Bu şikâyetni advokat Lilâ Gemeci bergen edi. Mahkmede, Üseinova şikâyetni vaqtında berip olmasında israr eteler.
Bunı Qırım.Aqiqatqa «Qırım birdemligi» cemaat birleşmesi haber etti.
«Mahkemeci yeterli qadar ğayret etmegenim içün, müddetniñ ğayrıdan tayin etilmesinden red etti. Çağına yetmegen dört balam bar, hasta ediler. Olarnı aqayım Eldar Kantemirovağa qaldırmaq kerek edim eken. Aqayım ise bir buçuq yıldan berli qanunsız sürette tevqiflidir», – dedi Üseinova.
Mudafaa tarafı eñ yuqarı instantsiyağa istinaf şikâyetini berecek, dep bildirdi.
Rusiye kontrolindeki Aqmescit mahkeme rayonınıñ qadısı İlya İşçenko Aluştadaki «Hizb ut-Tahrir davasınıñ» mabüsi Eldar Kantimirovnıñ ömür arqadaşı Elvina Useinovanıñ memuriy davası boyunca üküm çıqardı.
Hatırlatamız, mahkeme vekili bu dava mabüsiniñ apayı Elvina Kantimirovağaqarşı «qadı ya da mahkeme vekiliniñ belgilengen qadı faaliyetiniñ tertibini temin etüv emirlerini yerine ketirmegeni içün» memuriy protokol tizdi.
Mahkeme vekili Kantimirovağa tibbiy maskanı yañlış taqqanını ayttı. Advokatnıñ bildirgenine köre, qadın oña hitap etilgenini birden añlamadı, amma keç oldı, çünki oña qarşı memuriy protokol endi tizilip başladı.
Bu bozuv içün 500 ruble para cezası berile.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
