Rusiye kontrolindeki Qırım müftiligi, mahküm etilgen qırımlı musulmanlarnı yarımadadan çıqarmamağa teklif ete. Bu aqta Rusiyege boysunğan Qırım ve Aqyar musulmanları diniy idaresiniñ matbuat hızmeti bildire.
Berilgen malümatqa köre, böyle bir ricanı Aqmescitniñ baş imamı, Rusiye kontrolindeki Qırım müftisiniñ Qırım boyunca Rusiyeniñ Cezalarnı yerine ketirüv federal hızmetiniñ İdaresi ile iş meseleleri yardımcısı Muhammed İslamov Tataristanda «Musulman diniy teşkilâtlarınıñ Cezalarnı yerine ketirüv federal hızmetiniñ İdaresi ile iş boyunca işçi gruppası konferentsiyasında» seslendirdi.
«Muhammed İslamov qırımlı mahkümlerniñ bulunma yeri olaraq Qırım Cumhuriyetini belgilemege teklif etti. Bundan ğayrı, o, Keriç ceza koloniyasında ibadethane açmağa teklif etti», – dep aytıla haberde.
Matbuat hızmetiniñ malümatına köre, konferentsiyada İslâm dinini kütken mahküm ve mabüslerniñ azatlıqtan marum qaluv yerlerinde bulunuv meseleleri muzakere etildi.
«Elâl» aşı, ibadet ve diniy bayramlarnı qayd etüv imkânları aqqında laf etildi», – denile haberde.
2014 senesi Rusiye Qırımnı işğal etken soñ Qırım musulmanları diniy idaresi yapqan areketlerini Qırımtatar Milliy Meclisi ile muzakere etmeyip, Rusiye qanunlarına köre Qırım ve Aqyar musulmanları diniy idaresi olaraq yañıdan qayd etilgen edi.
Rostov-na-Donu şeerindeki Şimaliy-Kavkaz okrugınıñ arbiy mahkemesi noyabrniñ 22-nde Yaltadaki «Hizb ut-Tahrir davasını» Qırımdaki prokurorğa tekrar baqması içün qaytarmağa qarar aldı. Advokat Sergey Legostovnıñ aytqanına köre, mahkeme davanı prokurorğa qaytarsa, şeklengen insanlar Rostovdan Qırımğa keri yollanıla, çünki tahqiqat tedbirleri keçirilmek kerek.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
