Aqmescit ilâchanelerinde tibbiy maska yoq, haber ete Qırım.Aqiqat mühbiri.
"Maskalarımız tahminen eki afta evel bitti. Başqa şeer ilâchanelerinden işdeşlerimiz, olarnıñki daa evel bitkenini ayta. Ne vaqıt ketirilecek - kimse bir şey bilmey. Marlâ ve bintni teklif etip olamız, maskanı yapmaq qolay", - dediler Semaşko hastahnesiniñ azbarında turğan ilâchanelerniñ birisinde.
Aynı vaziyet Aqmescitniñ daa başqa doquz aphanesinde.
Amma ilâchane hadimleri antiseptik spreyler yeterli olğanını ve paalılaşmağanında qandırdılar.
Daa evel Sudaq memuriyeti şeer ilâchanelerinde maska yetmegenini haber etken edi.
Aqyar sakinleri de maska olmağanına şikâyet ete. Olarnı satın almaq Yaltada da çare yoq.
Rusiye martnıñ 18-nden mayısnıñ 1-ne qadar çetel vatandaşları ve vatandaşlıqsız şahıslarnıñ kirişini yasaqladı.
Keçken künü dünyada 13 903 yañı koronavirus hastası qayd etildi, dep bildire Dünya sağlıq teşkilâtı. Böylece, Dünya sağlıq teşkilâtınıñ versiyasına köre, dünyada koronavirus pandemiyası başlağanından berli hastalarnıñ sayısı 167 511 insan oldı.
