Rostov-na-Donudaki Cenübiy bölgeniñ arbiy mahkemesi Aqmescit «Hizb ut-Tahrir davası» mabüsleri Cemil Gafarov, Alim Karimov, Seyran Murtaza, Erfan Osmanov ve Servet Gaziyevniñ tevqif müddetini üç ayğa devam etti.
«Qırım birdemligi» cemaat birleşmesiniñ haber etkeni kibi Gaziyev mahkeme oturışında SİZO hastahanesinden iştirak etken.
Qabaatlav tarafı sıñırlama tedbiriniñ uzatılmasını istegen. Prokurornıñ fikrince, mahkemelengenlerniñ tevqif qalmasınıñ esasları deñişmegen. Mahkemelergenler ise iç olmağanda qart mabüslerni ev apsine yibermege rica etken.
Aqmescitteki ekinci «Hizb ut-Tahrir davasınıñ» mabüsi 61 yaşında Servet GaziyevRostov-na-Donu tahqiqat izolâtorında mikroinsult keçirdi, dep bildire «Qırım birdemligi» cemaat birleşmesi apiske alınğan qırımlını yoqlağan advokat Aleksandr Stasükniñ malümatına esaslanıp.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
