Ekinci Aqmescit "Hizb ut-Tahrir davası"nıñ mabüsi Tofik Abdulgaziyev Rusiye Federatsiyasınıñ Çelâbinsk vilâyetindeki Verhneuralsk apishanesine etap etilgen. Bunı apayı Aliye Kurtametova haber etti.
Onıñ sözlerine köre, siyasiy mabüsni mahsus blokqa oturtqanlar, dep bildire "Qırım birdemligi" cemaat birleşmesi.
Uquq qoruyıcılarnıñ qayd etkeni kibi Abdulgaziyevniñ soy-sopu bir aydır onıñ bulunğan yeri ve sağlıq alı aqqında bilmey edi eken. Faal ailesinen yalıñız iyülniñ 22-nde bağlanıp olğan.
"Uzun vaqıt bir haber bile yoq edi", - dep ayttı apayı.
Mayısnıñ 12-nde Rostov-na-Donudaki Cenübiy bölgesiniñ arbiy mahkemesi ekinci Aqmescit "Hizb ut-Tahrir davası"nıñ mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa üküm çıqardı. Olar 12 ile 14 yıl apis cezalarsına mahküm etildiler. İzzet Abdullayev ilk 5 yılını apishanede keçirecek 12 yıl sert rejimli koloniyada qalmasına ve azat etilgen soñ 1 yıl azatlığı sıñırlanacaq, dep üküm çıqarıldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
