"Hizb ut-Tahrir davası" boyunca qabaatlanğan Rüstem Şeyhaliyev ve davanıñ daa eki iştirakcisi 2020 senesi yanvar 16-sından berli mahkeme psihiatrik ekspertizasını keçeler. Bunı Qırım.Aqiqat mühbirine advokat Emine Avamileva haber etti.
"Onıñ (Şeyhaliyevniñ - QA) qan, siydik analizlerini alğanlar, flüorografiya resmini çekkenler, EKG yapqanlar. Yanvarniñ 16-sından 17-sine gece o özüni pek yaramay duydı. Qan basqısı sıçray edi, yüregi buluna edi. Onıñce, bedenine stress olğan. SİZO kameralarında pek suvuq, bölükniñ ise, aksine, avası tınçıq. Belki alına ava şaraiti de tesir etti. İlâclardan bir şey teklif etmegenler, atta "Tsitramon" ya da "Spazmalgon"nı teklif etmediler. Yani, sağlığı içün ağır alda oña tibbiy yardım etilmegen", - dedi Avamileva.
Advokatnıñ aytqanına köre, Rüstem Şeyhaliyevniñ büyrek ve damar hastalığı bar, oñı baş ağrısı horlay. Şeyhaliyevnen beraber psihiatrik hastahanede davanıñ daa eki başqa iştirakçisi - Vladlen Abdulkadırov ve Riza İzzetov tutula. Olarnı anda bir afta evelce ketirgenler.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
