Rusiyeniñ Rostov-na-Donudaki 1-nci SİZO-sında tutulğan ekinci Aqmescit Hizb ut-Tahrir davası”nıñ mabüsi Riza İzetovnı kartserge qapatqanlar. O anda endi 10 kün otura. Bunı Qırım.Aqaqatqa “Qırım birdemligi” cemaat birleşmesi haber etti.
“Ozüni azmı çoqsı bir qarar duya, on künden berli kartserde otura. Anda bir insan olğanınıñ öz müsbet tarafları bar, amma menfiy tarafları daa ziyade, dey. Riza pek faal, pek munis bir adamdır, elbette subetdeşler yetişmey. Amma bu, esnaslarğa azırlanmağa, öz mevamını azırlamağa imkân bere, şunıñ içün bu müsbet taraflarnı qullanmağa tırışa”, – aytıp bergen birleşmege advokat Edem Semedlâyev.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 insan tutuldı. Cemil Gafarov da olardan biri ola. Aqmescitniñ Kiyev rayon mahkemesi episini apiske aldı.
Rusiye kontrolindeki Qırım Yuqarı mahkemesi Aqmescitteki «Hizb ut-Tahrir davası» altı mabüsiniñ – vatandaş jurnalisti Remzi Bekirov, faaller Farhod Bazarov, Şaban Umerov, Cemil Gafarov, Raim Ayvazov ve aq qorçalayıcı Riza İzetovnı apiste tutuv müddetini 2021 senesi yanvarniñ 14-ne qadar uzattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
