Rostov-na-Donudaki İstinaf arbiy mahkemesi ekinci Aqmescit “Hizb ut-Tahrir davası”nıñ beş iştirakçisi – Remzi Bekirov, Şaban Ümerov, Riz İzetov, Raim Ayvazov ve Farhod Bazarovnı tevqifli qaldırdı. Olar 2021 senesi iyunniñ 16-na qadar tevqifli qalacaq. Bu aqta Qırım.Aqiqatqa “Qırım birdemligi” cemaat birleşmesi haber etti.
Haber etilgenine köre, Farhod Bazarov keçken afta keskin nefes virus yuqunçına oğrağan, hastalıqtan el astında olğan ilâclarnen tedaviylenmege mecbur olğan. Şaban Ümerovnı ise yüreginde keskin ağrı tutqan.
“Şaban Ümerov, “stakan” içinde etap etilgenini ayttı. Bu, avtozaknıñ içindeki 50x70 sm teşkil etken bir bölük, bütün yol devamında anda tutulğan. Bu kibi şaraitni iskence kibi saymaq mümkün”, – aytıp berdi Nazim Şeyhmambetov.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 insan tutuldı. Cemil Gafarov da olardan biri ola. Aqmescitniñ Kiyev rayon mahkemesi episini apiske aldı.
Rusiye kontrolindeki Qırım Yuqarı mahkemesi Aqmescitteki «Hizb ut-Tahrir davası» altı mabüsiniñ – vatandaş jurnalisti Remzi Bekirov, faaller Farhod Bazarov, Şaban Umerov, Cemil Gafarov, Raim Ayvazov ve aq qorçalayıcı Riza İzetovnı apiste tutuv müddetini 2021 senesi yanvarniñ 14-ne qadar uzattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
