Yañı koronavirus yuqunçına oğrağan hastalar olsa, olar içün «№7 Aqmescit şeer klinik hastahanesinde» bir qaç yüz qoşma yuqunç yeri ayırıldı.
Bu aqta aprelniñ 4-nde Rusiye kontrolindeki Qırım Sağlıq naziri İgor Çemodanov Qırımda koronavirus yuqunçınıñ tarqaluvına qarşı tedbirler ştabınıñ toplaşuvında ayttı.
«Yañı koronavirus yuqunçı hastalarına tibbiy yardım köstermek içün №7 Aqmescit şeer klinik hastahanesinde 288 yuqunç yeri ayırıldı. Vaziyet kerginleşse, olar hastalarnı qabul etmege azır», – dedi o.
Çemodanovnıñ aytqanına köre, hastalar «yuqunç boksları olğan mahsus maşinalarnen» ketirilecek.
Memurnıñ bildirgenine köre, koronavirus şübhesinen hastalarğa yardım etmek maqsadınen yer ayırılğan Aqmescitteki №2 loqsahaneniñ vaqtınca deñiştirilüvine dair qarar alındı.
Qırımnıñ Rusiye Sağlıq nazirliginiñ soñki malümatına köre, işğal etilgen Qırımda çetel memleketlerinden kelgen 3039 insan tibbiy közetüv altında buluna, olardan 2957-si evde dinamik közetüvde, 67 insan hastahanede qala, 15 insan observatorlarğa tecrit etildi. Rospotrebnadzor malümatına köre, umumen Qırımda 18 COVID-19 hastası qayd etildi, 2 insan tüzelip hastahaneden çıqarıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
