№6 Aqmescit şeer hastahanesiniñ ekimleri, gece Aqmescit rayonınıñ Eski Orda (Lozovoye) köyüniñ yanında yol qazasına oğrağan üç adamnı qurtardı. Bu aqta “RİA-Krım”ğa Qırımnıñ rusiye Sağlıq nazirliginiñ matbuat hızmeti bildirdi.
“Yol qazasına oğrağan dört adam №6 Aqmescit şeer hastahanesine ketirilgen edi. Yaralanğanlardan birisi elâk oldı. Ekisi orta qarar alında, olarğa travmatologiya bölüginde kerekli tibbiy yardım etile. Daa bir kişige ambulatoriya yardımı etildi”, - dep aytıp berdiler nazirlikte.
Rusiye İİN-niñ Qırım idaresi, yol qazası neticesinde teşkerüvler yapıla ve bundan soñ qararlar alınacaq, dep bildirdi.
Aqmescit – Yalta yolunda aprelniñ 26-ndan 27-ne keçer gecesi Eski Orda (Lozovoye) köyü rayonında Chevrolet-Lacetti ve Mersedes Vito maşinaları çatıştı. Qırımdaki Rusiye Fevqulâde vaziyetler nazirligi qaza aqibetlerini yoq etmek içün 21 insan ve 7 dane tehnika celp etildi, dep haber etti.
2018 senesi dekabr ayında Qırım qurtarıcıları Qırımda büyük yol qazalarınıñ sayısı arttı, dep bildirdi. Qırımda 2019 senesiniñ ilk üç ayı içinde keçken seneniñ aynı müddeti içinde mesüliyetke çekilgen aydavcılarnıñ sayısı bir buçuq qat ziyade oldı.
