Gece Aqmescitni qar örtti. Fevralniñ 13-nde saba qar yağmağa devam ete. Bu aqta Qırım.Aqiqat mühbiri haber ete.
Şeer yollarında maşina sayısı bayağı eksildi.
Qar toplağan tehnika daa körünmey. Bazı yerlerde qaldırım ve yollarda «Gorod» müessisesiniñ hadimleri qar temizley, dep bildire mühbir.
Qırımdaki gidromettsentr haber etkenine köre, Aqmescitte keçken gece aman-aman aylıq qar norması yağdı – 11 mm qar. Qırım.Aqiqat mühbiri bildirgenine köre, bazı yerlerde qar 20 sm qadar yağdı.
Onıñ aytqanına köre, saba devam etken qarnı Qırım paytahtınıñ sakinleri soñki bir qaç yıl devamında körmedi.
Hatırlatamız, qurtarıcılar Qırımğa küçlü yağanaq ve suvuqlar kele, dep tenbilegen edi.
Cuma künü, fevralniñ 12-nde, yaramay ava sebebinden Aqyar körfezinden reyd qapatıldı.
Sevavtodor yaramay ava sebebinden yüksek seviyeli azırlıq rejimine avuştırıldı.
Aqmescit ava limanında Rusiye uçaqları keç qala.
Qırımdaki qoruqlar yaramay ava sebebinden ziyaretlerge qapatıldı.
