Aqmescitteki yañı Cuma Caminiñ açılış künü iç süslenüv leyhası deñişkeni içün bir yılğa qaldırıldı. Bu aqta Rusiye Devlet Dumasınıñ işğal etilgen Qırım deputatı Ruslan Balbek bildirdi. O, Qırımnıñ Rusiye yolbaşçısı bergen vazifesi üzerine qurucılıqnı idare ete. Balbekniñ aytqanına köre, interyer leyhasına «qırımtatar renkler» qoşuldı.
«Milliy medeniyetniñ hususiyetleri aks etilsin dep, qırımtatar milliy renklerini qoşmağa qarar alındı. Cami Şarqiy Avropada eñ büyük olacaq. Şimdi iç süslenüvnen bağlı bir qararğa keldik», – dep bildire Balbekniñ aytqanlarını Qırım akimiyetine yaqın olğan «Krıminform» neşiri.
Rusiye akimiyeti yañı Cuma Camini 2019 senesi aprelniñ 21-nde – Rusiye prezidentiniñ Qırımnıñ sürgün etilgen halqlarınıñ reabilitatsiyası fermanını imzalağan künü – açmağa planlaştırğan edi. Yañı kün – 2020 senesi aprelniñ 21-i.
Rusiye prezidenti Vladimir Putin 2019 senesi aprelniñ 25-nde Rusiye Tış işler nazirligine Türkiye prezidenti Recep Tayyip Erdoğannıñ Aqmescitteki büyük Cuma Caminiñ açılış merasimine teşrif buyurmasınıñ formatını iyünniñ 1-ne qadar tüşünmege vazife berdi. Rusiye prezidenti işğal altındaki Qırımnı ziyaret etip, bu tedbirge Erdoğannı davet etti, dep bildirdi. Recep Tayyip Erdoğan bunı açıq şekilde daa izaatlamağan edi.
Ukraina musulmanları diniy idaresiniñ müftisi Said İsmagilov musulman din erbaplarını ilhaq etilgen Qırımdaki Cuma Cami açılışını ziyaret etmemesine çağıra.
Leyhağa köre, Aqmescitteki Cuma Cami 5,7 biñ metr kârelik olıp, 2,6 biñ insannı sığdıracaq. İnşaat eki qısımdan ibaret – qubbeli esas bina ve kolonnalı ve abdesthaneli iç azbar. Cami qurucılığı 2016 senesi oktâbr ayında başladı, onı 2019 senesiniñ soñunda bitirmege planlaştırıla.
2018 senesi iyün ayınıñ soñunda Aqmescitte Qırımdaki Cuma Caminiñ büyük qubbesini qurmağa başladılar. Küzde qurucılar beton işlerini bitirip, caminiñ büyük qubbesini qurdı ve binanıñ iç süslenüvine başladı. 2018 senesi oktâbr ayınıñ soñunda camide liftler çalıştırıldı.
