Qırımtatar faali Edem Bekirov, bir künde eki kere tibbiy baqmasını yapmaq içün Semaşko adına hastahanege alıp çıqtılar.
Bunı Qırım.Aqiqat mühbirine advokat Aleksey Ladin aytıp berdi.
Ekimler, Bekirovnıñ belkemik hastalığını kördi.
"Bugün (avgust 22-sinde - QA) men Edem Bekirovnı SİZOnıñ tibbiy bölüginde yoqladım. O, onı kene Semaşko adına hastahanege baqmaq içün alıp bara ediler, dep ayttı. Onı nevrolog, endokrinolog, hirurg-ortoped baqtı. Oña belkemiginiñ ve köküs qafesiniñ MRT-si yapıldı. Baquvnıñ neticeleri yazma şekilde daa yoq. Amma, onıñ aytqanına köre, Bekirovnıñ belkemik problemaları bar ve ameliyatqa ihtiyacı bar", - aytıp berdi Ladin.
Advokat, ekimlerniñ tarafından Bekirovğa diqqat, bu davağa imaye, matbuat ve halqara topluluq qoşulğanınıñ neticesidir, dep tüşüne.
"Men mütehassıs degilim, amma soñki eki künde müşterim keçken tibbiy baqıluv kerçek soyuna oşay, yani evelde kibi sade kâğıt yazmalıq degil. Avgustnıñ 27-sinde onı Nevrologiya hastahanesine alıp baracaq olalar. Ümüt etem ki, onı sadece baqıp yibermezler, amma tedaviylevini de yaparlar", - dep qoştı o.
Avgustnıñ 27-sinde Qırımda faal Edem Bekirovnı hastahanege qoyacaq olalar. Ukraina ombudsmeni Lüdmila Denisova Facebookta yazğanı kibi, Bekirovnı Cumhuriyet Nevrologuya hastahanesine qoyacaqlar ve 7-8 kün devamında baqacaqlar.
Daa evel Rusiye nezaretindeki Qırım Yuqarı mahkemesi, Bekirovnıñ Yañı Qapığa (Krasnoperekopsk) etapını lâğu etti.
