Aqmescit rayonınıñ Colman (Pionerskoye) köyünde yel 26 şahsiy evniñ damına zarar ketirdi. Qırımdaki Rusiye Fevqulâde vaziyetler nazirliginiñ idare malümatına köre, eki evniñ damı bütünley qoparıldı.
«24 evniñ damı qısmen 25%-dan 50%-ğa qadar zarar kördi. Bundan ğayrı, yel neticesinde Aqmescit rayonınıñ Mamut Sultan (Dobroye) köyünde elektrik naqil hatları zarar kördi. Neticede 8000 kişi elektrik teminlevinden kesildi», – dep aytıla haberde.
Qurtarıcılarnıñ malümatına köre, iyülniñ 28-nde saba elektrikler berildi, 17 evniñ damı da ğayrıdan tiklendi.
Bundan ğayrı, Aqmescit rayonınıñ Mamut Sultan köyünde magistral boruğa terek tüşti.
Aqmescitte ve rayonında iyülniñ 28-nde furtuna ihtarı ilân etildi.
