Qırımnıñ Aqmescit rayonındaki Saraylı Qıyat (Mirnoye) köyünde suv olmağanı içün fevqulâde vaziyetler rejimi ilân etildi. Bu aqta Aqmescit rayonınıñ Rusiye memuriyeti apparatınıñ reberi İvan Yurçenko haber etti.
Akimiyetniñ malümatına köre, sakinlerge suv ketireler.
«Mirnoye» belediye müessisesiniñ reberi Yevgeniya Gudimovanıñ «Krıminformğa» bildirgenine köre, quyular quruğanından 1800 insan suvsız qaldı.
«Quyumız bar edi, amma avadan sebep suv quyudan ketti. Suv ilk sefer bitti. Yañı suv borusını qurmağa planlaştıramız, şeer borusından keçirecekmiz. 1,2 km mesafede qoyulacaq. Suv künde dört kere ketirile», – dedi Gudimova.
Qayd etilgenine köre, yañı suv borusını avgustnıñ 15-ne qadar qurmağa planlaştıralar.
İyül ayında Qırımda suv anbarlarından Aqmescit ihtiyacalarına suv berecek suv borusını qurğan Rusiye arbiyleri keldi.
İyülniñ 13-nde Rusiye Mudafaa nazirligi bildirdi ki, Rusiye ordusınıñ bölükleri Taygan ve Aqmescit suv anbarlarını birleştirecek borunıñ 50-den çoq kilometrini qoydı.
İyünniñ 11-nde Qırımnıñ Rusiye yolbaşçısı Sergey Aksenov, Taygan suv anbarını Aqmescitni suvnen temin etüv sistemasınen vaqtınca birleştirecek suv boruları Rusiyeden Qırımğa keldi, dep bildirdi.
İyülniñ 8-nde berilgen malümatqa köre, Aqmescit içün suv yaqın suv anbarlarınıñ yedeklerinden 110 künge qaldı.
«Fobos» Rusiye ava merkeziniñ mütehassısı Yevgeniy Tişkovets, 2019 senesi küzde başlağan qurğaqlıqtan soñ yaz yağmurları Qırımda suv qıtlığı problemini tolusınen al etip olamaz, dep qayd etti.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
