Qırımnıñ Kirovsk rayonında belgisiz şahıslar 29 yaşındaki Mambet Asan-Ustanı tutıp esir ettiler. İhtimal ki, yaqalav mayısnıñ 18-nde Aqmescit yaqınlarında demiryol relsleriniñ "patlatılması" ile bağlı edi. Bunıñ aqqında "Qırım birdemiligi" haber ete.
"Yolnıñ yanında tamamınen renkli beyaz bir Vesta bar edi. Bu maşna onıñ peşinden ketti, soñra Kirovsk tarafına ozıp keçti, Juravkadan soñ yavaşlamağa başladı ve onıñ maşnası ögünde yavaş ketti. Qarşısına yol polisi hadimleri keldi ve vesiqalarnı teşkermek içün polis bolügine alıp ketti", - dep tarif etti Mambetniñ soyu.
Rusiye yol polisi hadimleri aqşam saat 8-lerde onı yaqalağan. Asan-Usta tek gece telefon etip, Aqmescitte bellisiz bir binada tutulğanını, anda ise başına çuval taqıp ketirilgenini bildirip oldı. Berilgen malümatqa köre, onı nasıldır itiraf vesiqalarnı imzalamağa mecbur etkenler ve Acı Qal köyünıñ yaqınlarında demiryol hattınıñ patlatılması ile bağlı sorğuğa çekkenler.
Asan-Ustanıñ sözlerine köre, polis bölüginden çıqqanda, oña maskalı adamlar ücüm etken, onı burıp, közlerini ve ağzını qapatıp, mikroavtobusqa oturtqanlar ve tehdit etkenler.
"Koridor boyu ketip, merdivenge yaqınlaştıq, bayağı vaqıt aşağı tüştik, belki bir buçuq-eki qat edi. Anda tüşken soñ meni oturğıçqa oturttılar, qırmaçalar elimde, çuval ise başımda edi. Oturğıçqa oturtqanlarınen birden dediler: "İmzala, itiraf et". Men de cevaplandım: "Neni itiraf etmelim? Men bir şey yapmadım". Olar kene dediler: "Bugünki vaqiadan haberdardırsıñ. Bugün Acı Qalda ne yaptıñ?", - dep aytıp berdi Asan-Usta.
Bellisiz adamlar demiryolda qaza yüz bergen vaqıtta onıñ ne yerde olğanını, "Ukrayina ile munasebtleri" aqqında sorağanlar, "yalan maşnasını" qullanacaqlarını aytqanlar vn öldürüv ile tehdit etkenler.
"Soñra kene eldivenli ve maskalı kişi kirdi. Menim şeylerimni qaytardı, başıma çuval taqtı ve kene skotçnen sardı, qollarıma qırmaça taqtı ve onıñ aytqanlarını yapmağa emir etti. Meni aynı yolnen çıqardılar, ve bu sefer yengil maşnağa oturttılar. 15 daqqadan soñ biz toqtadıq ve o maña dedi: "Mından çıqmaq isteseñ menim aytqanlarımnı yapacaqsıñ. Şimdi maskanı ve qırmaçanı çıqaracam, sen ise közleriñni qapatacañ. Maşnadan çıqacañ ve 150-ge qadar sayacañ ve areket etmeyceñ. Aylanıp baqmağa tırışsañ, biz qaytırmız", - dep aytıp berdi erkek.
Keçenlerde Aqmescit rayonında zahire taşığan vagonlar relsten çıqqan edi. Qırımnıñ işğal parlamentiniñ spikeri Konstantinov qazağa "patlatuv" dedi ve bunda Ukrayinana qabaatlaı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
