Aqmescit rayonınıñ Saraylı Qıyat (Mirnoye) köyünde Rusiye memurları Aqmescit ve Aqmescit rayonınıñ sakinlerinden kelecek nesillerge mesac ile kapsulanı qoydı.
Aqmescitniñ Rusiye memuriyeti haber etkenine köre, kapsulanı 45 yıldan soñ açmağa planlaştıralar – Qırım ilhaqınıñ elli yılına.
Memurlar yazğan mesaclarında «medeniyetimiz ilmiy-tehnik ilerilevniñ yañılıqları arasında maneviy-ahlâqiy esaslarnı coymayıp, yañı seviyege çıqtı», dep ümüt besledi.
Bundan ğayrı, tedbirde Aqmescit rayonınıñ faal sakinleri «Qırım baariniñ» beş yıllıq hatıra işaretinen taqdirlendi.
Rusiye prezidenti Vladimir Putin martnıñ 18-nde işğal etilgen Qırım ve Aqyarnı ziyaret etmege planlaştıra. Putin Aqmescitte Qırım ve Aqyar cemaatçılığınıñ vekillerinen körüşip, Qırım ve Aqyar ilhaqınıñ beşinci yılına bağışlanğan merasimlerde iştirak etecek.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
