Qurtarıcılar Aqmescit rayonınıñ Kürlük-Baş ayırığında orman yanğınını söndürmege devam ete. Qırımnıñ Rusiye fevqulâde vaziyetler nazirliginiñ noyabrniñ 16-nda bildirgenine köre, «vaziyet stabil», yanğın alanı artmay.
«Ormandaki qorlanğan ateşler söndürile, ateş merkezleriniñ etrafı qazıla, qorlanğan terekler pıçıla. Fevqulâde adise alanında monitoring keçirmek içün Rusiye Fevqulâde vaziyetler nazirliginiñ Mi-8 vertolöti köterildi», – dep aytıla haberde.
Daa evel yanğın alanı 52 gektarğa tarqaldı, amma noyabrniñ 15-nde aqşam söndürildi, dep haber etilgen edi.
Yanğın noyabrniñ 14-nde çıqtı. Ertesi künü Aqmescit rayonında fevqulâde vaziyet rejimi ilân etildi. Yanğınnı söndürmek içün qurtarıcılar aviatsiyanı celp etti.
Yüksek yanğın telükesi sebebinden yarımadada furtuna havfı ihtarını noyabrniñ 18-ne qadar uzattılar.
