Aqmescit ava limanınıñ yolcular terminalında 20 metrlik naratnı tiklediler. Onıñ qoyulması bir qaç kün devamında yapıla edi.
Ava limanınıñ matbuat hızmeti bildirgeni kibi, bu, Qırımnıñ bina içinde qoyulğan en yüksek arçasıdır.
"Yañı yıllıq inşaat terminalnıñ birinci qatında tiklenildi. Onı 1000-ge yaqın oyuncaq ve yarım kilometrge yaqın girlânda yaraştıra", - denile beyanatta.
Dekabrniñ 25-inden başlap terminalda bala eglendiricileri çalışacağı qayd etile.
2018 senesi aprelniñ 16-nda Aqmescitte Rusiye akimiyeti ava limanınıñ yañı terminalını açtı. Onı 22 ay içinde aman-aman 32 mlrd ruble (13 mlrd ğrıvnâ – QA) sarf etip qurğanlar.
Ukraina Qırım üzerindeki ava boşluğından mesüliyetli olğan devlet olaraq Rusiyeniñ Qırım işğalinden soñ onıñ uçaq areketlerini ve ava limanlarını qapattı. Anda ve andan kerçekleştirilgen uçaq seferleri Ukraina ve halqara qaidelerini boza. Daa soñra Qara deñiz üzerindeki bazı yollar vatandaş aviatsiyası içün kene açılğan edi. Rusiye ava şirketleri yasaqqa baqmadan, halqara uquqnı bozıp, ilhaq etilgen Qırımğa uçmağa devam ete.
