Rusiye nezaretindeki Aqmescit akimiyeti 2020 yılda Danilova soqağında tıynaqnıñ tübüni temizleycek ola. Şeer memuriyetiniñ matbuat hızmeti haber etkeni kibi, buña 38 million ruble masraf etmege planlaştıralar.
"Tıynaqnıñ temizlemesine qararnen 38 million ruble kerek. Şimdilik Aqmescit memuriyeti mebuslar ile bu paranı şeer büdjetinden ayırmaq yolunı qıdıra. Temizlev işlerini 2020 senesinde yapmağa planlaştırıla", - haber etti şeer memuriyetiniñ hadimi İvan Liseçko.
Bundan ğayrı, memurnıñ aytqanına köre, tıynaqnıñ yanındaki Slavânka özenini de temizleycek olalar.
Dekabrniñ başında Rusiye nezaretindeki Aqmescit memuriyetinde, tış icracısı, kontraktqa köre Salğır ve Küçük Salğır yalı kenarlarınıñ temelli tamirini bitirdi, dep bildireler.
Akimiyet Salğırnıñ temizlemesine umumen 500 million rublege qadar masraf etmege azırlana edi.
