Aqmescitniñ Rusiye akimiyeti «izinsiz qurulğan 51 obyektni» yıqmağa qarar aldı.
Bu aqta aprelniñ 3-nde Aqmescitte qanunğa zıt bir şekilde qurulğan obyektlerni yoq etüv komissiyasınıñ toplaşuvında aytıldı, dep bildire Kreml kontrolindeki Aqmescit memuriyeti.
«Memuriy-tehnik kontrol departamenti, ticaret ve ealige turmuş hızmet kösterilüvi idaresi, belediye kontroli idaresi bergen malümatlar baqılğan soñ izinsiz qurulğan 51 obyektni yıqmağa qarar alındı», – dep aytıla haberde.
Qayd etilgenine köre, dört obyektniñ yerleşüvi qanunğa uyamı ve obyekt saibini bilmek içün vekâletli hızmetlerge qoşma muracaatlar berildi, dep qoştı matbuat hızmeti.
«Aqmescit memuriyeti komissiyasınıñ iş neticelerine köre qanunğa köre qurulmağan obyektlerniñ yıqıluvına dair qararlar çıqarılacaq. Yıqıluvına berilgen müddet yekünlengen soñ qanun talaplarına köre obyektlerni yoq etüv işleri keçirilecek», – dep qayd etti şeerniñ Rusiye memuriyetiniñ yolbaşçı muavini Sergey Titarenko.
2019 senesi işğal etilgen Qırımnıñ Rusiye akimiyeti «izinsiz qurulğan obyektler» olaraq ilân etilgen binalarnı, hususan yarımadanıñ cenübiy yalısında, yıqmaq içün 300 mln ruble ayırmağa planlaştıra.
Qırım ve Aqyarnıñ yerli akimiyeti qanunsız ilân etilgen ticaret inşaatlarınen küreşe, hususan tükân, qavehane, bazarlardaki ticaret noqtaları ve raatlıq evleri yıqıla.
2018 senesi aprel ayınıñ ortasında belli oldı ki, Qırımnıñ Rusiye akimiyeti yıqılacaq binalarnıñ cedvelini tize.
2018 senesi apreliniñ soñunda Aqyarda tahminen 500 insan şeer akimiyetinden razızıq alınıp keçirilgen mitingge çıqtı. Mında ticaret obyektleriniñ yıqılmasına qarşı çıqqan iş adamlarınıñ aqlarını qorçalamağa tırıştılar.
