Bu sene Aqmescit mektepleriniñ birinci sınıflarına altı biñ bala baracaq, dep haber ete Rusiye kontrolindeki Aqmescit memuriyetiniñ matbuat hızmeti.
«Fevral ayında arizalar qabul etilip başlağanından bayağı çoq oldı», – dep tarif etti şeer memuriyetiniñ tasil idaresi yolbaşçısı Tatyana Suhina.
Onıñ aytqanına köre, bu yıl «birinci sınıflarnıñ sayısını arttırmağa qarar alındı».
«Birinci sınıflarnıñ sayısı 18-ge arttırılacaq. Bu küçük sınıflar degil, 30 ve daa ziyade talebelik büyük sınıflar», – dep qoştı Suhina.
Rusiye kontrolindeki Qırımnıñ Tasil nazirligi 2019 senesi birinci sınıfqa 23 biñden ziyade bala baracaq, dep bildirgen edi. İşğal etilgen Qırım akimiyeti bu sene Bilgi künü sentâbrniñ 2-nde olacaq, dep ilân etti.
Ukraina prezidentiniñ bala aqları vekâletlisi Mıkola Kuleba yañı çağırılış Rada işine başlağan soñ şekillendirilecek Ukraina ükümetini Rusiye işğal etken Qırımda balalarnıñ – 450 insannıñ – aqlarını temin etüv problemini acele baqmasına çağırdı. Laf balalarnıñ Ukraina vatandaşlarınıñ pasportlarını aluv, öksüz balalar, ana-babanıñ vasiyliginden marum etilgen ve Ukraina akimiyeti tayin etken vasiyi olmağan balalarnıñ sıñırdan keçüvi, Qırım Muhtar Cumhuriyetinde yaşağan balalarnıñ Ukraina mahkemelerinde menfaatlarınıñ temsil etilüvi aqqında kete.
