Aqmescit-Adler treni fevralniñ 5-nde Soçi rayonında yer yılışması sebebinden toqtatıldı, dep haber ete «Grand Servis Ekspress» Rusiye taşıyıcısınıñ matbuat hızmeti.
Berilgen malümatqa köre, yer yılışması Soçiniñ Lazarev rayonındaki Dagomıs – Loo aralığındaki demir yollarında oldı, Tuapse – Adler taraflarında tren areketi toqtatıldı.
«Tren yolcuları Tuapse stantsiyasından avtobuslarnen yollanacaq. «GSE» levhalı avtobuslar vokzal meydanına kelecek. Tafsilâtlı malümat içün ozğarıcılarğa muracaat etmek mümkün», – dep aytıla haberde.
№316 Adler – Aqmescit treniniñ yolcuları içün de avtobus kelecek.
Cedvelge köre, Aqmescit – Adler treni er kün Aqmescitten 14:15-te çıqa ve 9:58-de Adlerge kele. Diger taraftan ise Adlerden 13:28-de çıqa ve 07:25-te Aqmescitke kele.
İşğal etilgen Qırım ve qomşu Rusiye arasında trenler Keriç (Qırım) köpründen keçe.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
