Aqmescitte Rusiye kontrolindeki şeer şurasınıñ deputatları qırımtatar uçucısı, Sovetler Birliginiñ eki defa qaramanı Amet-Han Sultannıñ abidesini qoymağa añlaştı. Bu aqta «Krıminform» bildire.
«Muracaat etkenniñ parasına Amet-Han Sultan abidesiniñ qoyulmasına izin bermek, adres: Aqmescit ş., Amet-Han Sultan meydanı (Pionerskiy aralığı, Kirov cad., Pionerskiy ar., 3 qullanılmağan bina, Pionerskiy ar., 1 çoq qatlı evnen sıñırlanğan topraq damartısı)», – dep aytıla vesiqa metninde.
Aqmescitniñ Rusiye şeer şurasınıñ reisi Viktor Ageyevniñ aytqanına köre, şeer şurasına Qırımnıñ Rusiye ükümeti milletlerara munasebetler işleri devlet komitetinden muracaat etildi.
«Abide meraqlı, leyhasını kördim. Cemaat parasına yapacaqmız», – dep qoştı Ageyev.
Abide leyhasını eykelci Ayder Aliyev yaptı. Müellifniñ ğayesine köre, Amet-Han Sultan sovet uçucısı urbasında olacaq. Abide fiyatı 10 million rublege yaqındır.
Qırımtatar halqınıñ erbabı, Sovetler Birliginiñ eki defa qaramanı, uçucı Amet-Han Sultan 1920 senesi oktâbrniñ 25-nde Alupkada doğdı. Babası – lakets (doğma Dağıstandaki Tsovkra-1 avulından), anası – qırımtatarı. Em dağıstanlılar, em qırımtatarlar Amet-Han Sultannı milliy qaramanları dep sayalar. Amet-Han Sultan 603 cenk uçuşını kerçekleştirip, natsist Almaniyanıñ ava quvetlerine ait 30 uçaqnı şahsen ve 19 danesini taqım erkânında urıp tüşürdi. Uçucı 100 çeşit uçquçnıñ qullanuvını ögrendi, onıñ ücümleri 4237 saatnı teşkil etti. Amet-Han Sultan Tu-16 adlı uçqan laboratoriyada sınav uçuşını kerçekleştirgende elâk oldı. Moskvadaki Novodeviçye mezarlığında defin etildi. 2015 senesi mayısnıñ 14-nde Ukraina Yuqarı Radası «Aqmescit» ava limanına Amet-Han Sultan adını berdi. Onıñ adını Mahaçkala (Dağıstan, Rusiye) ava limanı da taşımaqta.
