Qara deñizde Aqmeçit qasabası yanında üç künden berli ğayıp olğan akvalangcını qıdıralar. Bu aqta Rusiye FVN-niñ Qırım idaresi bildirmekte.
"Qıdıruvda "Krım-Spas" ve "RosSoyuzSpas" hadimleri iştirak etmekte, olar yalı kenarını teşkere, Devlet Küçük Gemiler İnspektsiyası (DKGİ) suvda yalı boyu qıdıra, FVN hadimleri ve göñülliler de deñiz kenarını baqıp çıqa", - dep yaza müessise başı Sergey Şahovnıñ sözlerinden matbuat hızmeti.
Ava şaraiti bozulsa, ğayıp olğan adamnı "Krım-Spas" vertolötınen de qıdıracaqlar, dep qoştı nazir.
Akvalangcı üç kün evel ğayıp oldı, dep bildirile. Qurtarıcılar aytqanına köre, dört adamdan ibaret olğan akvalangcılar taqımı, rapan tutmaq içün qayıqnen deñizge çıqtı. Belgilengen vaqıtta aqaylardan birisi qaytmadı.
Bu yıl avgust ayında Qırımda Qara Acı (Olenövka) köyüniñ yanında aqmescitli dayver kezinti gemisiniñ tübüne tüşüp, elâk oldı.
