Rusiyede apis cezasına mahküm etilgen vatandaş jurnalisti Server Mustafayev Ukraina Milliy Jurnalistler Şurasına yazğan mektübinde zenaatdaşlarına "siyasiy mabüslerniñ ve qorantalarınıñ taqdirine" diqqat çekkenleri içün minnetdarlıq bildirdi. UMJŞ-nıñ yolbaşçısı Sergey Tomilenkoğa mektüpni jurnalistniñ ömür arqadaşı Mayye Mustafayeva berdi.
Mustafayev haber vastalarını Rusiyeniñ "terrorcı" ve "ekstremit" dep adlandırğan şahıslar aqqında daa çoq aytmağa çağırdı.
"Jurnalist zenaatında olğan er birimiz er kün adım-adım etmeli, saife-saife yazmalı ve Qırım meselesiniñ halqara kün tertibinden yoq olmasına yol bermemeli", - dep yazdı Server Mustafayev.
Jurnalist qayd etti ki, "aqiqat sözüni öldürmek mümkün degil" ve Rusiyeniñ "öz yalan propagandasına" masraf etken milliardlarğa baqmadan, "bizim birligimiz cöremelerden daa büyük, RF rejimininiñ avtomatlarından daa küçlü".
Öz mektübinde Mustafayev junalistlerni Kreml siyasiy mabüsleriniñ qorantaları ile yaqın tanışmağa ve olarnıñ ikâyelerini dünyağa bildirmege çağırdı.
"Keçmişniñ ayrı saifelerinde Ukrainadan, Avropadan olğan jurnalistler ile körüşüvlerim ve UMJŞ ofisinde keçirilgen körüşüv. Beraberlikte daa çoq şey yaparmız, eminim. Apis müdettimiz rezina degil", - dep yazdı o.
UMJŞ vatandaş jurnalistiniñ mektübine cevap berip, Qırımlı vatandaş jurnalistlerge destegini arttırmağaa vade ettiler.
"Rusiye basqılarnı qullanıp, onıñ nezaretinden tış olğan işğal etilgen Qırımnıñ aqiqatı aqqındaki haberlerni toqtatmağa istey. Ve apis etilgen zenaatdaşlarımızğa yekeyane yardım aletimiz - milliy ve halqara jurnalist birdemligi. Vatandaş jurnalistlerniñ, qorantalarınıñ taqdiri aqqında aytıp berip, ükümet ve halqara teşkilâtlar içün temellerni arttırmamız", - dep bildirdi UMJŞ yolbaşçısı.
Kyivde apis etilgen Qırımlı zenaatdaşları ve olarnıñ aileleri ile birdemlik bildirip "Vatandaş jurnalistleri müimdir" fotoresimler sergisi açıldı.
