«Qırım uquq qorucı gruppası», Qırım yarımadasında eñ azından 27 ukrain saytınıñ blok etilmesi aqqında bildirdi. Olarnıñ çoqusı onlayn haber vastaları, dep haber ete Azatlıq Radiosı.
«Tedqıq neticelerine köre, Qırımnıñ 12 mesken yerinden eñ azından 12 provayder tolusınn 22 ukrain haber vastasını blok ete. Olarnıñ arasında: Ukrinform, Tsenzor.net, QHA, Sled.net, İnformatsiyne öpir, UAinfo, Blackseanews, 112 telekanal, Apostrof, Glavkom, Golovne, Gromadske radio, Jurnalist teqiqatlarnıñ merkezi, Podrobitsі, strіçka, tone, TSN, Depo, Ukraina aqıqatı, RBK-Ukraina, Afta közgüsi , Herson Daily», – dep yazıla bildirmede.
Olardan ğayrı Linkedin, Qırımtatar Milliy Meclisi, «İyegovı Şaatları», Reintegratsiya nazirligi, «Hіzb ut-Tahrіr» teşkilâtınıñ saytları da blok etile.
«Saytlarnıñ çalışması 2021 senesi fevral-mart aylarında 12 türlü provayder yardımı ile Qırımnıñ 12 mesken yerinde teşkerildi», – dep qayd ettiler Qırım uquq qorucı gruppasında
Aq-uquq qorucılarnıñ malümatına köre, ukrain onlayn haber vastalarnıñ blok etilüvı işğal etilgen Qırım sakinleriniñ malümat aqqını boza.
Keçken sene Rusiye işğal etken Qırımda 9 mesken yerde 10 provayder tam şekilde 20 ukrain malümat saytını, eki içtimaiy ağnı, Meclis, «Hіzb ut-Tahrіr» ve «İyegovı Şaatları» saytlarını blok etken edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
