QırımSOS aq qoruyıcı teşkilâtı avgustnıñ 11-nde işğal etilgen Qırımda tintüvlerden soñ tutulğan qırımtatarlarnı Rusiye akimiyeti tarafından siyasiy taqiplerniñ qurbanı adlandırdılar.
"Bu, adetince altı ayda bir kere yüz bergen bir tintüvler dalğasıdır. Daima olğanı kibi qırımtatarlar terroristik teşkilâtqa alâqası olğanında qabaatlanalar. Tintüv ve yaqalavlarnıñ qurbanları çoqusı allarda vatandaş jurnalistleri ya da faaller ola", - dedi Yevgen Yaroşenko.
Onıñ qayd etkenine köre, al-azırda 11 qırımlı vatandaş jurnalisti Rusiye akimiyeti tarafından taqip etile.
Avgustnıñ 11-nde saba faaller işğal altındaki Qırımda Rusiye quvetçileri qırımtatarlarnıñ evlerini tinte, dep bildirdi. Advokatlarğa kirmege izin berilmedi, bazı yerlerde cep telefonı bağı söndürildi. Altı er adamı – Vilen Temeryanov, Enver Kroş, Seitâya Abbozov, Murat Mustafayev, Edem Bekirov ve Rinat Aliyev Rusiyede yasaqlanğan «Hizb ut-Tahrirde» iştirak etkeninde qabaatlanıp tutuldı.
Ukrayına prezidentiniñ Qırım Muhtar Cumhuriyetindeki temsilciligi qırımtatarlarnıñ evlerinde keçirilgen tintüvlerni takbih etti.
Avgustnıñ 12-nde Rusiyeniñ nezaretinde olğan Aqmescitniñ Kiyev rayon mahkemesi keçenlerde tutulğan qırımtatar faalleri Vilen Temeryanov, Enver Kroş, Seitâya Abbozov, Murat Mustafayev, Edem Bekirov ve Rinat Aliyevni 2022 senesi oktâbrniñ 22-nece tevqifli qaldırğan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
