İşğal etilgen Qırımda mülkniñ "devletleştirilüvi" dep adlandırılğan Ukrayina vatandaşlarınıñ şahsiy mülkiyetini musadere etüv ameliyatı devam ete. Rusiye akimiyetiniñ esas maqsadı — ukrayinlerni yarımadadan çıqarmaq, dep tarif etti Qırım.Aqiqatqa İnsan aqları regional merkeziniñ eksperti Nikita Petrovets.
2014 senesi yarımada ilhaq etilgeninden berli Rusiye onıñ toprağına öz qanunlarını kirsete. 2014-2015 seneleri mülkiyetniñ kütleviy şekilde alınması başlandı, lâkin 2022 senesi cenk başlağanından berli müsadirelerniñ mıqyası bayağı arttı.
Ekspertniñ aytqanına köre, 2022 senesi Rusiye akimiyeti, esaslar cedvelini kenişletip, mülk tutıp aluv mehanizmini yañarttı. Şimdi "dost olmağan memleketlerniñ vatandaşları" dep adlandırılğanlar mal-mülk tutıp alınğan esas kategoriyalardan biri oldı. Bu cedvelge, hususan, Rusiye istilâsını takbih etken ya da Rusiyege qarşı sanktsiyalar tayin etken Ukrayina, AB memleketleri, ABD ve diger devletlerniñ vatandaşları kirdi.
"Rusiye tecavuzına yaramay yanaşasıñız, sanktsiyalarnı kirsetesiñiz, demek, siz bu cedvelde olacaqsıñız ve dost olmağan memleketlerniñ vatandaşları bu sırada. Ve dost olmağan memleketlerniñ vatandaşlarınıñ mal-mülklerini yalıñız bu memleketke ait olğanları içün musadere ete bileler", — dep añlata Petrovets.
Aq qorçalayıcı emin ki, bu areketlerniñ maqsadı — ukrayinlerni yarımadadan çıqarmaq. "Soñra şunı aytmaq mümkün olacaq: mında iç bir vaqıt ne Ukrayina vatandaşları, ne de olarnıñ mülkiyeti bar edi, yalıñız Rusiye pasportları ile Rusiye ealisi ve ilâhre", — dep qoştı ekspert.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
