Rusiye nezaretindeki Qırım Yuqarı mahkemesi, Rusiye tarafından Ukrayina arbiy istihbaratına telegram kanalı vastasınen arbiy tehnika aqqında malümat bergeninde qabaatlanğan qırımtatar Çaraz Akimovnı beş yılğa azatlıqtan marum etti. Bu aqta "Qırım esnası" haber ete.
Qayd etilgenine köre, dava eki oturışuvda baqıldı.
"Ükümni, keçken sene Kıyivniñ Solomenskıy rayon makemesi tarafından devlet hainligi içün 14 yıl apis cezasına üküm etken makemeci Alla Hineviç tayin etti. Bu vaziyet makemeniñ Ukrayinadaki cenknen bağlı davalarnı baqqanında obyektivligini şübe altına qoya", — dep aytıla haberde.
Aq qorçalayıcılar, Rusiye quvetçileri tarafından açılğan devlet hainligi, işbirlik ve casuslıq aqqında davalarnıñ sayısı bir qaç qat artacaq, dep tahmin ete. Şimdi FSB bu kibi davalarnı aman-aman er kün aça, 2014 senesine qadar ise yılda 10 dava açıla edi. Ukrayinağa qarşı büyük cenk başlanğan soñ Rusiye Federatsiyasında devletke iftira aqqında madde cenkke qarşı çıqqanlar içün eñ populâr maqalelerden biri oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
