Aq qorçalayıcılar Rusiye Federatsiyası tarafından tutulğan qırımlılarğa tedaviylenmege bermegen Qırımdaki Rusiye akimiyetiniñ 22 vekiliniñ adını aydınlattı. ZMINA insan aqları merkezi ve Qırım aq qorçalayıcı gruppası bildirgenine köre, cedvelde olğanlar siyasiy mabüslerniñ aqlarını bozğanları içün sanktsion cedvelge kirsetilmeli.
«Esabatta biz cinayetçi olğan şahıslarnı qayd ettik: qadı, prokuror, ombudsman, apishane reberleri ve Rusiyeniñ Cezalarnı yerine ketirüv federal hızmeti yanındaki tibbiy müessiselerniñ reberleri», – dep qayd etti ZMINA leyha idarecisi Viktoriya Nesterenko.
Onıñ hatırlatqanına köre, 2023 senesiniñ başında tibbiy yardım alamağan Cemil Gafarov ve Konstantin Şiring Rusiye apishanelerinde can berdi. Olarnıñ hronik hastalıqları bar edi, SİZO şaraitlerinde sağlıqları ket-kete fenalaştı, amma izolâtorlarnıñ memuriyeti hastahanege yollamay ve ilâc bermege izin bermey edi.
«Rusiye akimiyeti hasta siyasiy mabüslerge tibbiy yardım köstermegen hadim ve uquq qoruyıcılarnı cezalamayıp, bu insanlarnıñ cinayetlerini gizlemek içün elinden kelgenini yapa. Cezasızlıq ve areketsizlik yañı-yañı cinayetlerge yol aça», – dep ayttı Qırım aq qorçalayıcı gruppasınıñ tedqiqatçısı İrina Sedova.
Aq qorçalayıcılarnıñ bildirgenine köre, apiste qırımlılarnıñ vefatına alâqası olğanlar:
• Pavlenko Pavel Vladimiroviç, Rusiye Cezalarnı yerine ketirüv federal hızmetiniñ (Aqmescit şeeri) «№91 tibbiy-sanitar bölük» sağlıq müessisesiniñ» yolbaşçısı. Aq qorçalayıcılarnıñ Cemil Gafarovnıñ davasında areketsiz olğanını isbatlağan delilleri bar.
• Berngardt Natalya İvanovna, Rusiye Federatsiyasında iç hızmet mayorı. Aqmescit şeeriniñ SİZOsında nezaret altında olğan qırımlı Vladimir Dudkoğa tibbiy yardım kösterilmegenine alâqası bar.
• Berejnoy Sergey Vladimiroviç, Aqmescitteki SİZO-1 yolbaşçısı. İzolâtorda uyğun olmağan şaraitlerden zarar körgenler olaraq Cemil Gafarov, Oleg Prihodko, Galina Dolgopolaya, İrina Daniloviç, Amet Suleymanov.
«Ukrayına akimiyetiniñ vekillerine muracaat etip, bu cinayetçiler halqara sanktsion cedvellerine kirsetilsin ve cezasız qalmasın dep elinden kelgenini yapmasını rica etemiz», – dep ayttı Sedova.
Rusiye tarafından tutulğanlarğa tedaviylenmege imkân bermegen Rusiye akimiyetiniñ vekiller cedvelini mında oqumaq mümkün.
Ukrayına aq qorçalayıcı teşkilâtları tarafından tizilgen «Gafarov-Şiring» cedveline qırımlılar kirdi, aq qorçalayıcılar olarnı siyasiy mabüs dep saya ve bazıları Rusiye apishanelerinde tibbiy yardım alamay.
21 ad ve soyadından ibaret cedvel Rusiye apishanelerinde tibbiy yardım alamayıp vefat etken siyasiy mabüsler Cemil Gafarov ve Konstantin Şiringniñ adlarını aldı. «Gafarov-Şiring» cedvelinde olğanlarnıñ ekseriyeti qırımlılardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
